Nakit-an sang Provincial Environment and Natural Resources Office (PENRO) nga naatrasar-gamay ang probinsya sang Iloilo sa adoptive measures ilabi na subong nga daku gid nga halit ang tuga sang climate change kaangay sang pagbaha.
Sa interview sang Bombo Radyo kay PENRO head Atty. Cesar Emmanuel Buyco, iya ginpahayag nga gamay pa ang mga kanal sa mga populated areas, kag madamo sang ginapanghaboy nga mga basura rason nga indi dayon maka-ilig ang tubig.
Kabahin sang ginplastar sini nga mga tikang sang Provincial Government amo ang “Forest Province” status nga ginalagas sang probinsya nga malab-ot sa 2044.
Lakip sa ginahimo agud maangkon ini nga status amo ang Tanum Iloilo for MoRProGRes Framework 2024-2044 nga nagatuyo nga ma-cover ang mga kagulangan sa Iloilo paagi sa data-based implementation.
Suno kay Buyco, importante man ang proyekto sa imprastraktura ilabi na bangud dako gid ang volume sang ulan subong kaangay sang na-eksperyensyahan sang nagligad nga bulan bangud sa enhanced southwest monsoon ukon habagat.
Masako man ang opisina suno kay Buyco sa reforestation sa forest land kag watershed areas.
May yara man sang ginapatigayon nga development sang integrated social forest project bilang resource base para sa food security kag tourism; kag pagpakig-angot sa publiko kag sa private stakeholders agud nga makampanya ang pagtanum sang kahoy kag forest development activities sa mga balay, eskwelahan, opisina, mga banwa, kag iban pa nga mga lugar.#
(Photo: Balita Halin sa Kapitolyo)
