Dapat nga magpatigayon ang Ombudsman sang kaugalingon nga imbestigasyon sa mga flood control projects, ginaalegar nga budget insertions, kag iban pa nga mga ginapahayag kurapsyon nga nagakatabo sa pondo sang gobyerno.
Sa interview sang Bombo Radyo kay Atty. Michael Henry Yusingco, isa ka constitutional law expert, iya ginpahayag nga mahimo makapatigayon ang Ombudsman sang motu proprio investigation ukon, buot silingon, wala na nagahulat ukon nagakinahanglan nga may mag-file pa sang kaso.
“Hindi kailangan na may magsampa ng kaso sa kanila,” pahayag sini. “Under the Constitution and under the Ombudsman Act, they can initiate —on their very own— an investigation against criminal activities involving corruption.”
Paagi sa sini nga imbestigasyon suno kay Yusingco, mabusisi ang kriminal nga mga aktibidad lakip na ang posibilidad sang plunder.
Dapat suno sa iya nga na-umpisahan na ang preliminary investigation, natumod na kun sin-o ang mga tawo nga istoryahon, amo man kun sin-o ang mga posible nga persons of interest.
Ginpaathag sini nga indi maasahan nga mangin impartial ukon patas ang imbestigasyon sang Kongreso sa flood control projects, ilabi na bangud klaro nga may mga legislators nga involved sa sini nga mga eskandalo kag kurapsyon pati na sa pagduso sang insertions sa national budget.
“Gusto natin na may patunguhan [ang imbestigasyon ng Kongreso]. Mayroon tayong responsibilidad bilang civil society na tutukan itong imbestigasyon na gagawin ng Kongreso para siguraduhin na kahit paano ay lumabas lahat ng impormasyon na importante,” dugang niya.
Sa privilege speech ni Senator Panfilo Lacson sang nagligad nga semana, nabuyagyag nga 40% lamang sa flood control funds ang nagakadto sa actual implementation samtang ang nabilin naman ang nagakadto sa kickbacks kag sa corruption.#
