Nadiskubrehan sang Iloilo City Government nga wala sang Mayor’s Permit ang flood control projects nga ginapatigayon sang duwa ka mga kompaniya nga ginapanag-iyahan sang mag-asawa nga Sara kag Pacifico Discaya.
Ini ang ginalakipan sang masunod:
1.Construction of Flood Mitigation Structures – Construction of Flood Mitigation Structure in Lapuz Iloilo City, Section 1
2.Construction of Flood Mitigation Structures – Construction of Flood Mitigation Structure in Lapuz Iloilo City, Section 2
3.Construction of Flood Mitigation Structures – Waterways Rehabilitation and Coastal Protection Section1, Iloilo City
4.Construction of Iloilo City Flood Mitigation Structures – Iloilo City Iloilo Comprehensive Flood Mitigation Project Section 2 Barangay Tacas, Jaro, Iloilo City
Ini ang resulta sang review sang City Treasurer’s Office sang kapin 90 ka ongoing projects sang Iloilo City District Engineering (ICDEO) Office nga ginpondohan sa idalom sang General Appropriations Fund humalin sang 2022 tubtob 2025.
Ang ginatumod nga kompaniya nga wala sang permit amo ang St. Timothy Construction Corporation kag Alpha and Omega General Contractor & Development Corporation.
Sa pahayag ni Iloilo City Mayor Raisa Treñas, ang makaalarma pa amo nga sa mga proyekto sa idalom sang St. Timothy Construction, indi matumod sang ila representative kun diin ang actual sites sang proyekto bisan pa nga nahatagan sang Notice to Proceed sang Iloilo City Engineer’s Office sa idalom ni Engr. Roy Pacanan.
Padayon subong ang on-site monitoring kag inspections sang City Treasurer’s Office sang mga infrastructure projects sa syudad agud masiguro nga ang contractors naga-secure sang nagakaigo nga permiso kag nagasunod sa layi.
Suno sa alkalde, ini nga inisyatibo ginahimo para ma-protektahan ang public interest kag masiguro nga legal kag insakto ang tanan nga government projects sa syudad.
