Ginbulgar ni Senate President Pro Tempore Panfilo “Ping” Lacson nga may kaangtanan si anay Department of Public Works and Highways (DPWH) secretary Manuel Bonoan sa isa ka “growing family business” sang government flood projects.
Base sa research sang opisina ni Lacson nga iya ginpresentar paagi sa privilege speech, naangot si Bonoan sa MBB Global Properties Corporation nga ginapanag-iyahan sang pamilya Maglanque sang Candaba, Pampanga.
Ang amo man nga pamilya ang nagapanag-iya sang Globalcrete Builders nga nakakuha sang P2.195 billion nga balor sang flood control projects sa Bulacan halin sang 2018 tubtub sang 2024.
Sa MBB Global Properties Corporation, ginlista ang anak ni Bonoan bilang isa sa mga tag-iya. Ang isa pa ang anak sang mayor, samtang ang isa naman anak ni DPWH Undersecretary Roberto Bernardo.
Ang MBB suno kay Lacson ang acronym mismo sang tatlo ka mga apelyido nga amo ang Maglanque, Bernardo, kag Bonoan.
“Maglanque, Bernardo, Bonoan — MBB. Coincidentally, these are the prominent surnames in today’s flood control saga: Candaba Mayor Rene Maglanque, patriarch of the Maglanques behind Globalcrete Builders, the contractor for multi-billion peso flood control projects,” suno sa senador.
“Kaya naman pala ang palaging depensa ni dating DPWH Sec. Bonoan — isolated case lang daw ang nakita ni Pangulong Bongbong Marcos na ghost project sa Bulacan,” pahayag pa ni Lacson. “Bonoan probably doesn’t want Globalcrete to be further exposed in the investigation.”
Si Bonoan amo ang public works secretary halin sang July 1, 2022, kag nag-resign lamang sang Septyembre 1, samtang si DPWH Undersecretary Roberto Bernardo naman ang nag-file sang early retirement matapos maangot man sa ma-anomaliya nga flood control project.
