Gintumod ni Iloilo 1st District Rep. Janette Garin ang tatlo ka nagapanguna nga mga isyu nga hatagan atensyon sa nagapadayon gna imbestigasyon na duwa ka sangay sang kongreso sa anomaliya sa mga flood control projects sa pungsod.
Sa interview sang Bombo Radyo kay Garin nga nagaserbe man nga House Deputy Speaker, iya ginpahayag nga kinahanglan tutukan ang mga masunod: una ang ghost projects; ikaduwa, ang sub-standard nga mga materyales; kag ikatatlo, ang insertions sang mga proyekto.
Nagapati naman si Garin nga dako ang mabulig sang independent commission nga gintukod ni President Ferdinand Marcos Jr.
Una na nga ginsiling ni Marcos nga ang nasambit nga komisyon ang ginabug-usan sang mga personallidad nga wala sang koneksyon sa gobyerno partikular ang yara sa nanuhay-tuhay nga background pareho sang former justice, isa ka investigator kag forensic accountant.
Ginpahayag naman ni Garin nga ang ila nga ginahimo nga imbestigasyon sa kamara ang wala sang biases kag wala sang pagpamahog sa mga resource persons para lang magbuyagyag sang mga pangalan sang mga tawo nga involved sa bilyones pesos nga balor sang mga maanomaliya nga flood control projects.
