Nagapadayon ang kontrobersiya sa maanomalya nga flood control projects nga ginakabig subong nga isa sa pinakamadako nga korapsyon sa kasaysayan sang pungsod. Sa tunga sang imbestigasyon sang Kamara kag Senado, madamo na sang personalidad kag politiko ang nabuyagyag. Apang ginahulat pa sang publiko kun sin-o gid ang mapasakaan sang kaso kag ano nga klase sang kaso ang igasaka batok sa ila.
Sa interview sang Bombo Radyo kay Atty. Noel Palomado, Bombo Abogado, ginpahayag niya nga nagalawig na ang anomalya nga ini. Matapos ang pila ka hearing, naguwa na ang pila ka ngalan nga ginatudlo nga may koneksyon sa multi-billion peso nga scam. Suno sa iya, sa mga nagliligad nga tuig ang kaso sang Napoles sa PDAF scam nga naglab-ut lang sa 10 bilyon pesos, kag sa subong ginakabig nga mas dako pa. Sa insertion sang 2025 General Appropriations Act, naglab-ut ini sa 450 bilyon pesos. Dugang pa, sa sulod sang tatlo ka tuig ang mga flood control projects may trillion pesos nga budget. Apang nakita nga substandard kag may mga proyekto nga wala naga-exist ukon ginatawag nga ghost projects.
Kaangut diri ginpatpat ni Senator Ping Lacson ang mga kaso nga pwede ipasaka batok sa mga opisyales sang DPWH kag mga contractors. Lakip na ang mga lawmakers kun mapamatud-an nga na-involve. Ini nga mga kaso amo ang ‘malversation’, ‘plunder’, ‘Anti-Graft and Corrupt Practices Act’ kag ‘RA 1379’ nga nagatuhoy sa ‘unexplained wealth’.
Ginpamangkot man si Atty. Palomado kun ano ang kinalain sang kaso nga plunder kag Anti-Graft sa isyu sang flood control projects. Suno sa iya, ang plunder nagatuhoy sa dako nga kantidad sang kwarta nga ginpangawat sang isa ka opisyales. Sa kaso sang flood control, may mga dokumento nga gin- falsified. Pareho sang inspection reports, final completion reports kag mga papeles halin sa accountant kag district engineer. May mga proyekto nga ginbudgetan sang 100M pesos pero wala gid naga-exist. Ini nga mga ebidensya nagapakita sang klaro nga korapsyon nga ginbuhat sang public officials kag private individuals.
Ginpamangkot man si Atty. Palomado kun paano ma-establish ang koneksyon sang mga ginadudahan nga congressman kag senador sa mga kaso. Suno sa iya, may mga ngalan na nga nagaguluwa. Ginlawag ni Pacifico “Curlee” Discaya ang mga congressman nga nakabaton sang porsyento halin sa proyekto. Ginbuyagyag man ni DPWH Assistant Engineer Bryce Hernandez ang pila ka mga ngalan sang senador. Kun ma-implicate sila sa preliminary investigation, pwede sila mapasakaan sang kaso base sa mga dokumento nga nakuha sang Commission on Audit kag DPWH. Kun may independent commission nga matukod, mas madali pa nga ma-include sila sa kaso.
Sa isyu naman sang unexplained wealth, ginpabutyag ni Atty. Palomado nga ang alegasyon pamilya Discaya may 9 ka construction companies kag mga luxury cars kung kun indi ini magtugma sa ila SALN ukon Statement of Assets, Liabilities, and Net Worth.
Ginpatpat man ni Atty. Palomado nga ang Bureau of Internal Revenue (BIR) pwede man madalahig may papel man sa maanomalya nga flood control projects kag pwede nga makasuhan bangud ang buwis nga halin sa pumuluyo kag kun mapamatud-an sa fraud audits kag may korapsiyon nga makita pagakasuhan man sila. Suno sa iya, dapat tutukan sang gobyerno ang ini nga isyu agud maprotektahan ang pondo sang pungsod.
