Ginlubog sang halos lampas-tuhod nga baha ang dalanun sa Brgy. Oñate de Leon, Mandurriao, Iloilo City, partikular sa atubang sang Mandurriao public cemetery kag subdivision, matapos ang mamunog nga ulan.
Ang nasambit nga lugar ginabaha na bisan pa sa gamay lang nga pag-ulan, nga nagahatag sang kabudlayan sa mga residente kag nagapadulong nga mga estudyante.
Sa interview sang Bombo Radyo kay Flordeliza Regalado, isa ka residente sang barangay, ginpahayag niya nga kada mag-ulan, ginabaha gid ang ila lugar bisan pa gamay lang ang ulan.
Suno sa iya, palpak ang pag-ubra sang drainage system sang mga contractor, kag kada mag-ilis ang mga lider, ginabakbak naman ang dalan.
Ginpabutyag man niya nga makapila na ini ka beses ginkay-o ang drainage system, apang wala sa gihapon sang pagbag-o sa sitwasyon.
May yara sang ongoing nga konstruksyon sang dalan sa lugar nga ginapatigayon sang Department of Public Works and Highways District Engineering Office kag ang proyekto ginadumala sang 5S Construction and Supply kag may balor nga masobra 9 ka milyon. Apang wala ginpahayag kun san-o nag-umpisa ang konstruksyon kag kun san-o ini matapos.
Dugang pa sang mga residente, mabudlay ang paglabay sa nasambit nga lugar ilabi na sa mga estudyante nga nagapadulong sa eskwelahan.
Bangud sa tubig nga mahigko, posible nga magresulta ini sa mga masakit pareho sang leptospirosis, nga ginakabalak-an nila para sa ila mga kabataan. /JDS
(Reported by Bombo Lyka Sandiego via Bombohanay Bigtime)
