Ginatudlo nga isa ang proyekto sang Metro Pacific Iloilo Water (MPIW) sa mga rason sang liwat nga pagbaha nga na-eksperyensyahan sa Barangay Navais, Mandurriao, Iloilo City.
Suno ini kay Punong Barangay Jim Christopher “Patong” Capalihan matapos ang mamunog nga pag-ulan nga gindala sang Enhanced Southwest Monsoon subong nga adlaw, Hulyo 24.
Sa interview sang Bombo Radyo kay Capalihan, iya ginpahayag nga apektado sang baha ang Sitio Pueblo kag Sapa kag nagalab-ot pa sa tuhod ang kataason sang tubig nga wala pa nag-subside tubtub subong.
Pahayag sini, alagyan gid ang amo nga lugar pagguwa sa ila nga barangay gani nga nakatuga ini sang perwisyo sa madamo nga mga pumuluyo.
Suno sa punong barangay, sang may gintukod anay nga drainage project sa ila nga lugar, nasolbar na ang ila problema sa baha.
Pahayag pa sini, maayo na ang sitwasyon sa nagligad nga halos 10 ka tuig apang nagbalik ang perwisyo matapos ginbukad ang dalan kag may ginbutang ang MPIW nga dalagku nga tubo.
Ginalantaw nila suno kay Capalihan nga gintambak lamang ang mga duta, balas, kag bato sa sulod sang drainage rason nga indi makailig sang maayo ang tubig.
Ginareklamo man nila ang 15 tubtub 20 ka cutting ukon ang pagkihad sang dalan sa ila nga barangay.
Pahayag nila, napalab-ot na nila ang ila sulat halin pa sang nagligad nga tuig. Nagahatag man sang solusyon ang MPIW suno kay Capalihan, apang ginatambakan lang, wala pa ginapa-semento bangud may ibutang pa nga tubo, kag ginapahayag nga may problema sa kontraktor.
Sa subong, ginpabutangan anay sang caution tape ang lugar para sa safety kag may gin-deploy man nga mga barangay tanod agud makabulig sa mga nagalabay nga mga pumuluyo kag motorista.
Bukas ang Bombo Radyo sa sabat sang MPIW kasunod sang amo nga reklamo nga ginpalab-ot sa Bombo Radyo Iloilo.
