Ginsabat ni anay Senador Antonio Trillanes ang mga report nga nagaangut sa insidente kun sa diin ginpahayag nga nasapwan nga wala sang pangalibutan si anay Presidente Rodrigo Duterte samtang yara ini sa detention center sang International Criminal Court (ICC) sa The Hague, Netherlands.
Suno kay Trillanes, indi matuod ang ginapahayag nga insidente kag ginpasiguro niya nga may nakahanda nga medical team sa sulod mismo sang detention center, magluwas pa sa mga ambulansya nga naga-standby sa guwa.
Pahayag pa ni Trillanes, lima lang ka minutos ang kalayuon sang ospital halin sa ICC, gani suno sa iya, imposible nga indi gilayon maatipan kag madala sa ospital ang anay presidente sa tion sang emergency.
Dugang pa niya, wala man sang klaro nga basehan ang alegasyon nga may problema sa memorya si Duterte, nga una na ginpahayag sang iya abogado nga si Atty. Nicholas Kauffman, nga may yara ini sang cognitive deficiencies.
Ang pahayag ni Trillanes ang naguwa kasunod sang ginpahayag ni Vice President Sara Duterte, kun sa diin ginbuyagyag niya nga nasapwan nga unconscious ang iya amay sa sulod sang kwarto sini sa ICC detention facility.
Matandaan nga ginkwestyon ni VP Sara ang ICC bangud sa ginatawag niya nga kapabayaan sang institusyon sa paghatag sang simple nga medical nga kinahanglanon sang iya amay, kaangay na lamang sang pagbulong sang ingrown sang tiil sini.
