Padayon sa gihapon ang pagpangayo sang klaro nga update ni Gobernador Arthur “Toto” Defensor Jr. sa estado sang Aganan Flyover kag iban pa nga proyekto sang national government nga yara sa probinsiya sang Iloilo.
Antes pa man ginpadala ang sulat kay Department of Public Works and Highways Secretary Vince Dizon, ginpahayag nga madugay na ini nga ginamonitor sang provincial government.
Suno sa gobernador, ginapangayo na nila ang status report sang mga proyekto sa sulod sang duha ka tuig, kag ang sulat nga ginpadala sa bag-o nga Secretary sang ahensiya, formalidad lang kuno.
Ginpahayag man nga ang provincial government pa ang nagpahulam sang equipment sang ginpatigayon ang soil testing sa lugar sang Aganan Flyover, agud mahibaluan ang kondisyon sang duta nga gintukoran sini.
Sa interview sang Bombo Radyo kay Governor Arthur Defensor Jr., ginpahayag niya nga ginamonitor na sang iya opisina ang proyekto halin pa sang nagligad nga mga binulan kag tuig.
Ginpabutyag man sang gobernador nga kinahanglan nga mahibaluan sang lokal nga panguluhan ang kahimtangan sang mga proyekto agud masiguro nga nagaalayon ini sa plano sang probinsiya kag sa kaayuhan sang mga pumuluyo./JDS
(Reported by Bombo Phauline Pillora/Bombohanay Bigtime)
