Ginplastar ni Department of Social Welfare and Development (DSWD) Secretary Rex Gatchalian ang nagkalain-lain nga mga programa kag bulig sang ahensya para sa mga pumuluyo sang Iloilo sa iya pagbisita sa probinsya kag pagkigkita kay Governor Arthur Defensor Jr.
Sa interview sang Bombo Radyo kay Sec Gatchalian, iya ginpahayag nga lakip sa programa nga ginatutukan sang gobyerno amo sang financial assistance para sa mga sugarcane planters kag sugar farm laborer nga apektado sang Red Stripe Sugarcane Insect ukon RSSI.
Suno kay Gatchalian, ang Passi City ang una nga nagdeklara sang state of calamity bangud sa RSSI, rason nga ginatutukan sang DSWD ang target nga 7,000 ka farmer kag farm laborer nga apektado sang pest infestation.
Pahayag niya, gin-umpisahan na ang payout para sa una nga 1,600 ka benepisyaryo kun sa diin ang mga kwalipikado nga benepisyaryo ang ginapaabot nga makabaton sang sobra P10,000 nga assistance,
Ginpahayag man niya nga ginamonitor sang ahensya ang posible nga paglapta sang epekto sang RSSI sa iban pa nga lugar rason nga padayon ang pag-coordinate sang DSWD sa provincial government kag mga LGU agud masundan ang epekto sang RSSI kag mahibaluan ang dugang nga kinahanglanon sang mga pumuluyo nga apektado sini.
Ginpatpat man ni Gatchalian nga ginabase sang DSWD ang listahan sang mga benepisyaryo sa datos nga ginahatag sang local agriculture offices, agud ma-identify ang mga farmer kag farm laborer nga apektado kag dapat makabaton sang assistance.
Dugang pa niya, nagapabilin nga handa ang ahensya nga maghatag sang dugang nga social welfare kag financial assistance sa mga pumuluyo nga apektado sang RSSI kag iban pa nga krisis.
