May ipatuman nga temporary road closure sa intersection sang Barangay Aganan, Pavia, Iloilo, partikular sa intersection sang Gorriceta Avenue.
Sa interview sang Bombo Radyo kay BM Rolando Distura, chairperson sang Committee on Infrastructure, iya ginpahayag nga may patigayunon nga installation kag launching ang Department of Public Works and Highways sang prestressed concrete girders para sa Aganan Flyover.
Ginpahayag ni Distura nga ipatuman ang road closure sa Setyembre 19 kag 20, Setyembre 26 kag 27, amo man sa Oktubre 10 kag 11 sa mga oras alas-7 sang aga tubtob alas-5 sang hapon.
Suno kay Distura, ginpili ang mga petsa nga wala sang klase kag wala sang opisina agud malikawan ang pag-istorbo sa mga estudyante kag mga naga-trabaho.
Ginapangabay naman ang mga motorista nga likawan anay ang nasambit nga dalan kag mag-agi sa iban nga alternative routes agud malikawan ang traffic kag inconvenience.
