Nagpabutyag sang kabalaka kag pagkadismaya si 4th District Board Member Rolando Distura bangud sa padayon nga manubo nga presyo sang palay sa Probinsya sang Iloilo.
Sa iya gindeliver nga privilege speech, ginpahayag ni Distura nga base sa iya pagpakig-angot sa pila ka mga mangunguma, nagapabilin lamang sa P10 tubtob P12 ang presyo sang kada kilo sang palay.
Ginpabutyag man sini ang kabudlayan sang mga mangunguma nga nagainvest sa binhi, abuno, kag irigasyon, kag makaisa nagapangutang pa agud may itanom sa talamnan.
Sa interview sang Bombo Radyo kay Distura, ginpahayag sini nga may pila ka mangunguma nga nagasiling nga indi nila kinahanglan ang P7,000 nga ayuda, kundi mas importante ang maayo nga sistema.
Ginpanawagan man ni Distura sa Department of Agriculture Region 6, National Food Authority 6, Fertilizer and Pesticide Authority, Department of Trade and Industry 6 kag iban pa nga ahensya sang gobyerno nga usisaron liwat ang procurement price kag palawigon ang suspensyon sang rice importation.
Ginpunto man ni Distura ang panindugan ni Governor Arthur Defensor Jr. nga padayon nga suportahan ang Iloilo bilang agricultural province.|JDS
(Reported by Bombo Phauline Pillora/ Bombohanay Bigtime)
