Gin-report sang Philippine Institute of Volcanology and Seismology (Phivolcs) nga mahimo makonsiderar nga “doublet earthquake” ang natabo sa Manay, Davao Oriental subong nga adlaw, Oktubre 10.
9:43 kaina sang aga sang natabo ang magnitude 7.4 nga linog kag 7:12 naman subong nga gab-i, gintay-og liwat sang 6.8 magnitude nga linog ang amo man nga area.
Suno sa Phivolcs, ang “doublet earthquake” amo ang linog nga nagakatabo sa halos pareho nga area nga may duha ukon masobra pa nga main shocks nga may gamay nga kinalain sa magnitude.
“This happens when faults or trenches are causing the stress to trigger a sequence of events,” paathag pa sang Phivolcs.
Ginaplastar nga halimbawa sang doublet earthquake events amo ang 2023 Hinatuan Earthquake sa Surigao del Sur (magnitude 7.4 sang Disyembre 2 kag magnitude 6.8 sang Disyembre 4), kag ang May 1992 magnitude 7.1 kag magnitude 7.5 Manay earthquake nga gin-trigger man sang Philippine Trench.
Suno kay Phivolcs Director Teresito Bacolcol, nahamtang ang Philippine Trench sa nasidlangan nga bahin sang Pilipinas —halin sa Bicol sa Luzon tubtob sa Mindanao.
Sa pihak nga bahin, sa separado nga report sang bureau subong nga gab-i, nagdangat na sa 458 aftershocks ang na-rekord (as of 8 p.m.) kasunod sang magnitude 7.4 nga linog kaina sang aga.#
