Gin-report sang Department of Science and Technology – Philippine Institute of Volcanology and Seismology (DOST-PHIVOLCS) nga nagdangat na sa 808 aftershocks ang na-rekord kasunod sang magnitude 7.4 kag magnitude 6.8 nga linog sa Manay, Davao Oriental.
13 sa sini nga aftershocks ang nabatyagan gid suno sa ahensya. Naglab-ot naman sa 5.8 ang pinakamabaskog nga na-rekord base sa 8 a.m. nga report subong nga adlaw, Oktubre 11.
Una na ginpahayag sang Phivolcs nga mahimo makonsiderar nga “doublet earthquake” ang natabo.
9:43 kahapon sang aga sang natabo ang magnitude 7.4 nga linog kag 7:12 naman sang gab-i, gintay-og liwat sang 6.8 magnitude nga linog ang amo man nga area sa Manay.
Suno sa Phivolcs, ang “doublet earthquake” amo ang linog nga nagakatabo sa halos pareho nga area nga may duha ukon masobra pa nga main shocks nga may gamay nga kinalain sa magnitude.
“This happens when faults or trenches are causing the stress to trigger a sequence of events,” paathag pa sang Phivolcs.
Ginaplastar nga halimbawa sang doublet earthquake events amo ang 2023 Hinatuan Earthquake sa Surigao del Sur (magnitude 7.4 sang Disyembre 2 kag magnitude 6.8 sang Disyembre 4), kag ang May 1992 magnitude 7.1 kag magnitude 7.5 Manay earthquake nga gin-trigger man sang Philippine Trench.
Suno kay Phivolcs Director Teresito Bacolcol, nahamtang ang Philippine Trench sa nasidlangan nga bahin sang Pilipinas —halin sa Bicol sa Luzon tubtob sa Mindanao.#
