Ginbawian sang kabuhi ang isa ka lalaki nga nagabisikleta samtang padayon nga ginabulong sa ospital ang driver sang modern jeepney nga gin-atake sang stroke sa tunga sang pagmaneho sa Molo, Iloilo City.
Sa interview sang Bombo Radyo kay Police Staff Sergeant Jessie Cabial, Traffic Investigator, ginpahayag sini nga ang duha ka salakyan nagasunod sa isa ka direksyon halin sa Fundidor padulong sa plaza sang Molo.
Pag-abot sa tunga sang Caltex Gasoline Station, hinali nga gin-atake sang stroke ang driver sang modern jeepney kag nadulaan sang kontrol, rason nga nabungguan ang nagabisikleta sa atubang sang jeep kag nadusdos pakadto sa sulod sang gasolinahan.
Suno kay Cabial, ang pilas sang biktima yara sa tiyan nga parte kag gilayon ini nga gin-operahan sa operating room, apang wala na ini nakaluwas.
Ang driver sang jeep, nga ginkilala nga si Conrado Labrador, 58-anyos sang San Juan, Molo, padayon nga ginabulong sa ospital bangud sa kritikal nga kahimtangan.
Matandaan nga kahapon, Oktubre 10, 2025, gindala sa ospital ang duha matapos ang insidente sa sulod sang Caltex Gasoline Station sa Molo nga suno sa isa ka gasoline boy nga si alyas Ian, halin sa Mohon terminal ang jeep kag pa-liko na kuntani sa gasolinahan sang gulpi lang nga nadulaan sang kontrol ang driver kag ginpahayag nga ginayudyod sang modern jeep ang nagabisikleta.|JDS
Via Bombo Reports 2nd Edition/by Bombo Jomar Villa
