Ginkumpirma sang Regional Disaster Risk Reduction and Management Council (RDRRMC) VI nga may duha nga napatay sa Western Visayas bangud sa epekto sang Bagyo Ramil.
Pareho nga halin sa Capiz ang mga casualties kag pareho man nga pagkalunod ang rason sang ila kamatayon.
Ang isa ka biktima amo ang 44-anyos nga residente sang Barangay Dinginan sa Roxas City, samtang ang isa pa amo si Mary Mae Colas Urdelas, 22-anyos, isa ka content creator nagikan sa Barangay Malocloc Sur sa banwa sang Ivisan.
Sa latest report sang council, ginpahayag man nga masobra sa 6,000 ka mga pamilya nga katumbas sang masobra 18,400 ka mga indibidwal ang naapektuhan sang bagyo.
Sa sini nga numero, masobra pa sa 1,700 ka mga pamilya ang nagapabilin sa 100 ka mga evacuation center.
Sa latest report naman sang state weather bureau, napasaka pa ang Yellow Warning sa pila ka areas sang Capiz nga nagakahulugan sang posible nga pagbaha sa manubo nga mga lugar kag posible nga pagkatiphag sang duta naman sa nabukid nga mga area.
