Nagapangagda ang Archdiocese of Jaro sa pag-upod sa daku na naman nga hublag-protesta batok sa kurapsyon nga patigayunon sa Nobyembre 30.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga duha ang halinan sang protesta nga amo ang atubang sang Jaro Metropolitan Cathedral kag atubang sang University of the Philippines-Iloilo City Campus.
Magatipon ang manug-protesta sa atubang sang Iloilo Provincial Capitol grounds kun sa diin may ginhanda nga mga speech agud nga ipakamalaot ang lapnagon nga kurapsyon.
Kaangay sa natabo nga anti-corruption protest sang Septyembre 21, maga-umpisa ang rally alas tres sa hapon.
Sa Nobyembre 30 nga kadungan sang Bonifacio Day, ang hiwaton nga mobilisasyon ang may tema nga “Padabdabon ang Kaisog ni Bonifacio: Martsa kag Manindugan Kontra sa Kagarukan.”
Pangunahan ini sang Kahublagan Kontra Kurapsyon nga isa ka alyansa sang nagkalain-lain nga mga sektor sang mga Ilonggo batok sa kurapsyon.
Antes sa Nobyembre 30, may yara na sang ginapatigayon nga weekly Friday actions sa syudad. Sang nagligad nga Byernes, nagtipon ang mga mga estudyante kag mga myembro sang cause-oriented groups sa atubang sang Jaro Metropolitan Cathedral agud magpatigayon sang silent protest kag candle-lighting activity.
Sandig sa simbahan, tuyo sang protesta nga pukawon ang ihibalo sang mga Ilonggo kag padayon nga magpahanumdom nga magbantay gid sa gobyerno agud nga mapapas ang sistematiko nga kurapsyon.#
