Gin-anunsyo sang state weather bureau nga nag-umpisa na ang northeast monsoon ukon ang amihan season sa Pilipinas.
Suno sa Philippine Atmospheric, Geophysical, and Astronomical Services Administration (PAGASA), ang pagkusog sang high pressure area sa East Asia ang nangin rason sang pagsulod sang amihan ukon northeasterly winds sa pinakamataas nga parte sang Northern Luzon.
Na-obserbahan man sang ahensya ang iban nga environmental conditions kaangay sang pagtaas sang atmospheric pressure kag paglamig sang palibot nga patimaan sang pagsugod sang northeast monsoon season.
Sa masunod nga mga bulan, magadala ang amihan sang matugnaw kag mamala nga hangin.
Gina-abisuhan ang publiko nga magbantay gid sa posible paglain ang kondisyon sa kadagatan kag pag-ulan nga mahimo dal-on sang shear lines.
Natabo ang pagsugod sang amihan season halos tatlo ka semana matapos gin-anunsyo sang PAGASA ang pagtakop sang southwest monsoon ukon habagat season.
Ang Amihan season kinaandan nga naga-umpisa sa Oktubre kag nagalawig tubtub sa Pebrero ukon sa Marso sa masunod nga tuig.
(Photo from Pixabay)
