Wala ginbaton sang San Juan Regional Trial Court (RTC) Branch 160 ang hingyo ni Senator Jinggoy Estrada nga temporary restraining order (TRO) batok kay anay DPWH Bulacan first district assistant engineer Brice Hernadez.
Nauna na nga nag-file ang senador sang kaso sibil para sa danyos lakip ang hingyo nga TRO kag injunction batok kay Hernandez para mapunggan ini nga maghimo sang mga alegasyon batok sa Senador.
Ang kaso ang may kahilabtanan sa akusasyon ni Hernandez batok sa Senador nga nakabaton kuno sang kickbacks halin sa maanomaliya nga flood control projects.
Apang, ginsiling ni RTC Presiding Judge Aicetel Lascano-Nethercott sa resolution nga wala sang awtoridad ang korte nga dumilian ang legislative committee halin sa pagmandato sa isa ka indibidwal nga mag-atubang kag mag-witness sa inquiries.
Ginpahayag pa sang korte nga gina-isyu lamang ang TRO kun ang amo nga topiko ang my “extreme urgency”.
Samtang, ginklaro naman sang kampo sang Senador nga TRO lamang ang wala ginbaton sang korte apang nagapadayon nga yara ang aplikasyon para sa Writ of Preliminary Injunction kag
natalana nga hearing sa Nov 12 kun sa diin hatagan ang pihak nga kampo sang tsansa nga magpresenta sang ila mga argumento kag ebidensya.
