Padayon ang pagpahanumdom sang Office of the Civil Defense (OCD) Region 6 sa publiko nga mangin alerto kag maghanda sa pag-abot sang Bagyo Tino.
Sa interview sang Bombo Radyo kay Dir. Raul Fernandez, Regional Director sang OCD 6, iya ginpahayag nga naka-preparar na ang mga nagkalain-lain nga cluster sang Disaster Risk Reduction and Management Office (DRRMO) sa bug-os nga rehiyon agud masiguro ang kaluwasan sang mga pumuluyo.
Suno kay Dir. Fernandez may yara na sang mga inugpanghatag nga mga food kag non-food items sa mga maapektuhan sang bagyo.
Nangayo man sang bulig ang ahensya sa Department of Public Works and Highways (DPWH) para sa pagposisyon sang heavy equipment sa mga national highways sa tion nga magkinahanglan sang pagpanghawan ukon pagresponde sa mga possible nga mga insidente.
Nag-coordinate man sang ahensya sa tanan nga mga local government units (LGUs) nga magpatuman gid sang preemptive evacuation, ilabi na sa mga lugar nga ginabaha, landslide-prone areas kag malapit sa baybayon, agud malikawan ang mga peligro nga dala sang bagyo.
Dugang pa ni Dir. Fernandez nga bago mag-evacuate, siguraduhon nga secure kag naka-lock ang mga balay.
Ginapahanumdom gid sang ahensya sa publiko nga magpabilin nga alerto kag magsunod sa mga mandu sang mga otoridad para sa kaluwasan sa tanan.
