Gin-anunsyo sang Department of Environment and Natural Resources (DENR) nag magpatigayon ini sang imbestigasyon angot sang pagsunod sang Monterrazas de Cebu Project sa mga environmental laws, sa diin isa ini sa ginabasol nga paglala sang baha sa nasambit nga lugar.
Ini matapos nga gin-ulan sang negatibo nga komento ang celebrity engineer nga si Slater Young bangud sang iya gin-develop nga The Rise at Monterrazas, kasunod sang lapnagon nga pagbaha sa Cebu bangud sang Bagyo Tino.
Matandaan nga sang tuig 2023, ginpresentar ni Slater ang “terraced, Banaue-inspired” nga residential complex nga nahamtang sa kabukiran sang Barangay Guadalupe.
Ang Monterrazas de Cebu ang proyekto sang The Mont Property Group, isa ka subsidiary sang 8990 Holdings Inc. nga gindisenyo ni Slater.
Suno kay DENR Region Assistant Director for Technical Service Eddie Llamedo, nagtukod na sila sang composite joint inspection kag investigation team nga yara na subong sa ground.
Lakip sa nag-upod sa inspection amo ang mga eksperto gikan sa DENR Region 7, Environmental Management Bureau (EMB-7), Mines and Geosciences Bureau (MGB-7), Provincial Environment and Natural Resources Office (PENRO) Cebu, Community Environment and Natural Resources Office (CENRO) Cebu City, amo man ang lokal nga pamunuan sang Cebu City kag Barangay Guadalupe.
Pahayag pa sang DENR, ginmaduan na ini ang developer nga magsumiter sang Engineering, Geological, and Geohazard Assessment report.
“If the investigation finds any violation of ECC conditions or environmental regulations, the DENR will not hesitate to enforce corrective actions, including suspension, penalties, or other legal remedies as provided by law,” suno sa ahensya.
