Gin-untat na sang mag-asawa nga sanday Curlee kag Sarah Discaya ang ila kooperasyon sa Department of Justice (DOJ) sa imbestigasyon sang ginapahayag nga anomaliya sa flood control projects.
Ini suno kay Justice Undersecretary Jesse Andres.
Ginpamangkot man ang opisyal tuhoy sa subong nga estado sang kooperasyon sang mag-asawa matapos niya ginpahayag nga madamo sang whistleblowers sa kontrobersiya sang flood control ang nag-umpisa na nga magtuad.
Matandaan nga sang Oktubre, nag-atras ang mag-asawa sa pag-kooperar sa Independent Commission for Infrastructure (ICI).
Ini matapos nila nga malantaw ang isa ka media interview kay ICI Commissioner Rogelio Singson nga nagasiling nga wala pa sang bisan sin-o ang kwalipikado bilang state witness.
Apisar, ginakabig ang Discayas bilang “protected witnesses” sa idalom sang Witness Protection Program (WPP) sang DOJ, ginsiling ni Andres nga wala sila sang pormal nga aplikasyon sa amo nga programa.
Suno sa opisyal, ang anay Undersecretary sang Department of Public Works and Highways (DPWH) Roberto Bernardo, mga anay inhinyero sang DPWH nga sanday Brice Hernandez, Henry Alcantara, Jaypee Mendoza, kag kontratista nga si Sally Santos lamang ang nakasumiter sang aplikasyon sa WPP.
