Ginpabutyag ni Punong Barangay Elfren Cenayo sang Don Esteban, Lapuz nga indi insakto nga ibasol sa barangay ang kapaltahan sang mga flood control projects sa ila distrito.
Suno kay Cenayo, una pa lang dapat gin-konsulta na ang mga barangay officials kag pumuluyo antes ginplano ang proyekto, agud masiguro nga maangay ini sa aktwal nga kinahanglanon sang lugar.
Gin-ako sang kapitan nga nag-coordinate ang DPWH, apang natapos na ang plano, kag suno sa iya dapat kuntani sa umpisa pa lang may consultations na sa mga local officials kag residente.
Dugang pa niya, wala sila sang plano nga magpugong sa proyekto kag handa sila magbulig, apang indi insakto nga ibasol sa barangay ang problema.
Ang pahayag ni Cenayo ang ginpagguwa matapos ginbasol ni Iloilo City Lone District Representative Julienne “Jamjam” Baronda ang barangay kag city government sa kapaltahan sang P101.32 million nga flood control project sa Lapuz District.
Matandaann nga nagsiling si Baronda nga responsibilidad sang barangay kag lokal nga gobyerno ang pag-atubang sa isyu sang mga informal settlers sa kilid sang waterways.
Ginpahanumdom man niya nga sa idalom sang Republic Act 7279 ukon Urban Development and Housing Act, obligasyon sang barangay ang pagkontrol sang pagdamo sang mga informal settlers.
Ginhangyo man sang kongresista nga magpondo ang lokal nga pamunuan para sa relocation sites sang mga apektado nga pamilya, agud indi ma-delay ang implementasyon sang proyekto.
Apang, suno kay Cenayo nga indi dapat basta-basta pahalinon ang mga informal settlers sa Budburan–Mansaya Creek kun wala pa sang relocation site nga ila pagasayluhan.
Nahibaluan nga ang proyekto ang gin-award sang Pebrero 2023 sa YPR Gen. Contractor and Construction Supply Inc., nga ginapanag-iyahan nanday Curlee kag Sarah Discaya.
May tatlo pa ka proyekto nga nagabalor sang P425 million nga gin-award sa St. Timothy Construction Corp., kag isa ka P150 million sa Alpha & Omega General Contractor & Development Corp., nga ginapanag-iyahan man sang pamilya Discaya.
Sang nagligad, nadiskubrehan nga 600 metros nga flood mitigation structure sa Bo. Obrero, Lapuz nga nagabalor P400 million ang wala pa matapos, apisar pa nga ginpondohan paagi sa congressional district office kag ginpatuman sang DPWH–Iloilo City District Engineering Office.
Matandaan nga sa pagbisita ni President Ferdinand R. Marcos Jr. sa Iloilo, iya ginpakamalaut ang madugay kag palpak nga implementasyon sang mga flood control projects nga, suno sa iya, nagapalala pa sang pagbaha.
Sa isa ka people’s meeting sa Barangay San Isidro, Jaro, nagreklamo man si PB Arnel Asturias sang Lapuz bahin sa madugay nga presentasyon sang DPWH.
