Gindeklarar ni President Ferdinand Marcos Jr. ang isa ka tuig nga state of national calamity sa bug-os nga pungsod.
Ini bangud sa lala nga gintuga sang bagyo Tino sa rehiyon sang Visayas, base sa rekomendasyon sang National Disaster Risk Reduction and Management Council (NDRRMC).
Sa idalom sang Proclamation No. 1077, ginmaduan ang tanan nga ahensya sang gobyerno nga ipadayon ang pagbulig kag pagpatuman sang mga tikang para sa pagbangin sang mga lugar nga tuman naapektuhan sang kalamidad.
Dugang pa sini, ginmanduam man sang Presidente ang mga departamento kag iban pa nga mga ahensya sang gobyerno nga makig-angot sa mga local nga pamunuan kag maghatag sang dugang nga serbisyo kagamitan, kag bulig, lakip na ang pagbaton sang bulig halin sa mga pribado nga sector kag mga international organization.
Sandig sa report sang Office of Civil Defense (OCD), naglab-ot na sa 224 ang kumpirmado nga napatay bangud sa paglaslas sang bagyo Tino.
Samtang, 109 naman ang padayon pa nga missing.
Ang pinakamataas nga numero sang patay ang na-record sa Cebu nga may 158 ka mga tawo.
Suno naman sa Department of Agriculture (DA), ginabulubanta nga P159.14 million ang kantidad sang halit sa agrikultura nga nakaapekto sa masobra 5,000 ka mga mangunguma.
Samtang, nagdangat naman sa masobra 6,000 metric tons sang humay kag 3,547 ka ektarya sang talamnan ang naapektuhan sang bagyo.
Sa pihak nga bahin, gin-anunsyo ni Palace Press Officer Undersecretary Atty. Claire Castro nga magapondo ang Office of the President sang P760 million nga cash assistance para sa mga local government nga naapektuhan sang bagyo Tino.
Kadungan sini, ginmanduan man ni Marcos ang Philippine National Police (PNP) kag Armed Forces of the Philippines (AFP) nga siguruhon ang peace and order sa mga lugar nga gin-igo sang bagyo.
Ang state of national calamity ang magapadayon epektibo sa sulod sang isa ka tuig, magluwas lamang kun ini ang temprano nga bawion sang president.
