Nagpa-BOMBO ang pila ka mga residente sa Barangay Quintin Salas, Jaro matapos nga magreklamo ang mga ini sa indi patas nga pagpangnagtag sang ayuda nga ginahatag sa mga apektado sang sunod-sunod nga bagyo.
Suno sa mga residente, madamo sa ila ang nakabaton sang P10,000 nga bulig halin sa Department of Social Welfare and Development (DSWD) Field Office VI, pinaagi sa programa nga Assistance to Individuals in Crisis Situations (AICS).
Apang, ginasiling nga ginabantayan sila sang pila ka barangay opisyal sa exit area kun sa diin ginapanghatag ang kwarta agud kuhaon ang P8,000.
Sa interview sang Bombo Radyo Iloilo kay alyas Angel, residente sang amo nga lugar, iya ginpahayag nga apisar nakabaton siya sang P10,000 nga ayuda, ginhingabot siya sang isa ka opisyal sang barangay kag ginpakuha ang P8,000.
Suno sa iya, P2,000 na lamang ang mabilin sa ila.
Samtang, sa separado nga interview kay alyas Althea, iya man gin-ako nga wala na siya mahimo sang gin-agawan siya sang kwarta sang taga-barangay.
Sa subong, padayon nga ginakwestyon sang mga pumuluyo kun diin kag paano ginagamit sang barangay ang kwarta nga ila nakuha gikan sa mga benepisyaryo.
