May iga-rekomendar si Vice President Sara Duterte nga abogado para kay Senator Ronald “Bato” dela Rosa pananglitan nga ipadakop man ini sang International Criminal Court (ICC).
Kasunod ini sang impormasyon nga ginpaguwa ni Ombudsman Jesus Crispin “Boying” Remulla sang nagligad nga semana nga may yara na sang arrest warrant, apang tubtub subong wala man sang nabaton nga kopya ang Department of Justice (DOJ).
Suno naman sa vice president, wala siya sang verified information kaangot sa ginaalegar nga warrant of arrest, apang suno sa iya, napaandaman na sini si Bato nga magpreparar sa posible mga tikang sang ICC.
Kabahin sang preparasyon suno kay Sara amo ang pagpili sang international law expert nga may eksperyensya man sa amo nga korte.
Pahayag sini, napahibalo naman sini sa pamilya sang senador nga may irekomendar siya nga British counsel nga eksperto sa international law.
Nahibaluan nga si Dela Rosa ang hepe sang Philippine National Police (PNP) sang ginpatuman sang Duterte administration ang drug war.
Nadakop na si former President Rodrigo Duterte sang Marso 11, 2025 kag didto subong naka-detain sa The Hague, Netherlands kag nagahulat sang trial sa kaso nga crimes against humanity.
