Gintawag sang director sang Jaro Archdiocesan Social Action Center (JASAC) nga butigon si resigned Ako Bicol Partylist Representative Zaldy Co.
Namunuhan ni Msgr. Meliton Oso ang isyu kay Co kag sa flood control anomalies kadungan sang homily sini kaina sang aga sa Jaro Metropolitan Cathedral natuhoy sa duha ka sugo sang Diyos nga indi magpangawat kag indi magbinutig.
Gin-mensyonar ni Oso ang video statement ni Co partikular sang nag-alegar ang anay kongresista nga wala siya nakapanginpulos sa P100-billion nga kontrobersyal nga insertions sa 2025 national budget.
Sandig sa ginpangbulgar ni Co nga amo anay ang chairman sang House Appropriations Committee, nagkadto tanan kanday President Ferdinand Marcos Jr. kag former House Speaker Martin Romualdez ang kuwarta.
“Pati kamo? Ginhatag ya lang kuno sa presidente? Wow! Tell that to the marines! Langas-langas nga istorya: ‘Isugid sa amo, agud sila magdamo’,” komento naman ni Oso.
Pahayag sang JASAC director, sa tunga sang nagakatabo nga trillion-peso corruption, kinamatarong sang mga Pilipino nga mahibaluan ang bug-os nga kamatuoran.
Dugang sini: “I appeal to Zaldy Co. Come home. Pirmahi ang imo ginapanghambal. We want the nation to heal. We want to forgive. Pero kun indi ka sinsero, excuse me!”
Ang konteksto sang homily ni Oso amo ang isa sa mga kinaiya ni Hesukristo nga amo ang pagpatawad sa mga sinsero nga nagahinulsol sa ila mga sala. Subong nga adlaw, Nobyembre 23, ginaselebrar sang Kristyano nga Katilingban ang Feast of Christ the King.#
