Patay ang lima ka indibidwal nga ginapatihan nga drug personalities sang nagbato sa mga pulis matapos ginserbehan sang warrant of arrest sa Kabacan, Cotabato.
Kalakip sa napatay ang isa ka aktibo nga commander sang Moro Islamic Liberation Front (MILF).
Suno kay P/Lt. Col. April Loue Palma, hepe sang Kabacan Municipal Police Station, hinali nga nagpalupok sang pusil ang mga suspek batok sa mga otoridad samtang pasulod pa lamang sa lugar nga nagresulta sa pagbalusay sang lupok.
Target sa amo nga operasyon ang walo ka wanted nga drug personalities.
Kalakip sa target sang warrant amo sanday Ibrahim Macalnas alyas “Kumander Bigkog” nga commander sang MILF; mga kaupod nga sanday Datukan Macalnas kag Ismael Luncayao kag duha ka iban pa.
Gilayon nga napatay sa shootout ang lima.
May isa naman nga kaupod sang mga ini ang naaresto kag may tatlo nga nakapalagyo.
Narekober sa lugar ang isa ka granda, mga armas kag mga bala.
