Nabutang sa record sang Independent Commission for Infrastructure (ICI) nga gin-imbitar sini kuntani bilang resource person si former Department of Public Works and Highways (DPWH) Undersecretary Catalina Cabral sa hearing sang Lunes, apang wala ini nagkadto.
Nagpadayon ang hearing sang amo nga adlaw, kun sa diin ang nag-atubang amo si AGAP Party-list Representative Nicanor Briones, apang naghingyo ini sang executive session, ukon wala gin-livestream.
Matandaan nga isa si Cabral sa ginhingadlan sang ICI nga dapat pasakaan sang kaso sa Office of the Ombudsman kaangot sa alleged ghost project sa Bulacan nga nagabalor sang P95 million.
Ang amo nga proyekto ang gin-implementar sang DPWH Bulacan 1st District Engineering Office paagi sa contractor nga Topnotch Catalyst Builders Inc.
Matandaan man nga ginlawag anay ni former DPWH undersecretary Roberto Bernardo si Cabral nga nagabaton sang cuts and control insertions para sa infrastructure projects sa National Expenditure Program (NEP).
Pasado alas 12:00 kaina sang kaagahon, gindeklarar si Cabral nga patay matapos ginaalegar nga nahulog sa pil-as kag nasapwan ang lawas sini sa malapit sa Bued River sa Kennon Road sa Tuba, Benguet.
Base sa pagpangusisa sang pulis, alas tres kahapon sang hapon, nagabyahe si Cabral kag ang iya driver sa Kennon Road padulong sa La Union, apang nag-request si Cabral nga magdulog sa Maramal, Camp 5, Camp 4, kag naghingyo nga magpabilin ini anay didto.
Nagbalik ang driver sa area sang alas singko sang hapon, apang wala na si Cabral.
Sang alas syete na sang gab-i, nagpangayo na sang bulig ang driver sa pulis bangud wala gihapon nakit-an ang anay undersecretary.
Sang nag-responde na ang mga pulis, nakit-an ang biktima sa kilid sang Bued River. Ginabanta nga 20 tubtub 30 ang kataason sang pil-as kun sa diin siya ginaalegar nga nahulog.
Wala pa sang kumpirmasyon kun may foul play sa insidente.#
