Ginkumpirma sang Department of the Interior and Local Government (DILG) nga ang bangkay nga nasapwan sa idalom sang pil-as sa Tuba, Benguet amo si former Department of Public Works and Highways (DPWH) undersecretary Catalina Cabral.
Suno sa DILG, base sa findings, nagsuprer si Cabral sang “blunt force trauma” kasunod sang pagkahulog sini sa amo nga lugar.
Suno kay Interior Secretary Jonvic Remulla, wala sang gunshot wounds ukon samad tuga sang pagkatiro sa lawas ni Cabral kag wala sang indikasyon sang foul play.
Pahayag pa ni Remulla, ginalauman nila nga itugyan sang bana ni Cabral ang personal nga mga gamit sang anay DPWH opisyal sa mga imbestigador.
Una naman nga ginpahayag sang Philippine National Police nga magaguwa ang resulta sang autopsy subong nga adlaw, apang kaina sang aga, sa impormasyon nga ginpaguwa ni Public Information Office chief Police Brigadier General Randulf Tuaño, wala sang DNA test nga gin-conduct kadungan sang autopsy.
Na-implicate si Cabral sa flood control corruption scandal kag ginpatawag sang International Criminal Court (ICC) sa hearing sang Lunes apang wala ini nagpakita.
Sang Huwebes sang gab-i, nakit-an ang lawas sini sa idalom sang pil-as sa Kennon Road, Tuba, Benguet. Wala pa sang na-establisar ang awtoridad kun may foul play sa kamatayon sini.#
