Marcos, maga-trabaho bisan Paskwa —Malacañang

Magatrabaho si President Ferdinand “Bongbong” Marcos Jr. bisan sa Paskwa.

Ginpahayag ini sang Malacañang duha ka adlaw antes ang pagselebrar sang Christmas Day.

Suno kay Presidential Communications Office Secretary Dave Gomez, subong pa lang, gin-mobilize na ang team sang presidente agud nga ma-facilitate ang gilayon nga pagrepaso sang kantidad kag tanan nga probisyon nga nakasugtan sa bicameral conference committee session.

Lantawon man sang presidente ang mga pagbag-o nga ginhimo halin sa orihinal nga ginpasa nga National Expenditure Program ukon NEP.

Suno sa Palasyo, ini nga maid-id nga pagrepaso amo ang magapasiguro nga magakadto sa husto ang kuwarta sang mga taxpayers.

“This thorough review will ensure that taxpayers’ money will be put to good use, contributing to the attainment of societal goals that will be felt by all Filipinos, consistent with his pronouncement in the last State of the Nation Address (SONA),” suno kay Gomez.

Pareho nga nag-extend sang session ang Kamara kag ang Senado tubtub sa Disyembre 30, 2025 agud nga maratipikahan ang proposed 2026 budget nga gin-aprubahan sa bicam.

Ang pagratipika sang Kamara kag Senado amo ang gina-require sa idalom sang layi antes pa man ipasa ang hagna sa lamesa sang presidente nga amo ang magapirma agud dalayon ini nga mangin layi.

Isa pinakatalalupangdon nga probisyon sa proposed P6.793-trillion nga 2026 budget amo ang pagbuhin sang pondo sang Department of Public Works and Highways. Halin sa P880-billion, ginhimo ini nga P529.6 billion.

Sang nagtuhaw ang eskandalo sa flood control kickback scheme, didto kag nag-compute liwat ang DPWH sa presyo sang nagapadayon nga mga proyekto, kag mga proyekto nga buot pa lang nga obrahon.#