Gin-anunsyo sang Department of Foreign Affairs (DFA) nga pahanugutan ang Chinese nationals nga makasulod sa Pilipinas bisan nga wala sang visa kag mahimo pa makatinir sa sulod sang 14 ka adlaw.
Epektibo ini nga visa-free arrangement umpisa buwas, Enero 16.
Suno sa DFA, ini nga tikang ang santo sa direktiba ni President Ferdinand Marcos Jr. nga i-facilitate ang trade, investments, kag turismo, kag pabaskugon ang “people-to-people exchanges” sa tunga sang Pilipinas kag China.
Pahayag pa sang ahensya, ang mahimo maka-avail sini nga pribilehiyo amo lamang ang Chinese nationals nga magasulod sa Pilipinas para sa negosyo kag turismo.
“Chinese nationals traveling to the Philippines strictly for tourism or business purposes may avail of the new visa-free entry privilege. The said privilege allows for a non-extendable 14-day stay, which is non-convertible to any other type of Philippine visa category,” suno pa sa DFA.
Ginklaro man sang ahensya nga mangin valid lamang ang pagsulod sa Pilipinas kun makaagi sa Ninoy Aquino International Airport sa Metro Manila ukon sa Mactan-Cebu International Airport sa Cebu.
Kinahanglan man nga magpresentar ang Chinese nationals sang passport nga valid sa sulod sang (at least) anum ka bulan, confirmed hotel accommodation/booking, kag return ukon onward ticket sa masunod nga pungsod nga kadtuan.
“To ensure that security and public order are maintained while facilitating the entry of legitimate travelers, checks on derogatory records of travelers will continue to apply,” dugang sang ahensya.
Mangin epektibo ini nga visa-free arrangement sa sulod sang isa ka tuig, kag igarepaso antes ang expiration sini sa 2027.
Ang China amo ang latest nga pungsod nga ginhatagan sang amo sini nga visa-free entry privilege sa Pilipinas. Matandaan nga ginpasugtan man anay ang Indian nationals nga makasulod sa pungsod sa sulod sang 14 ukon 30 ka adlaw nga wala sang visa.#
