‘ILOmination: Festival of Light Festivals’ nga kabahin sang Dinagyang, gindugukan sang mga Ilonggo

Gindugukan sang linibo ka mga Ilonggo kagab-i ang “ILOmination: Festival of Light Festivals” nga kabahin sang major highlights sang tuigan nga Dinagyang Festival.

Nag-umpisa ang illuminated parade halin sa Atria sa Sen. Benigno Aquino Jr. Avenue ukon sa Diversion Road kag nagdiretso sa Iloilo Business Park.

Lima ka competing light festival groups ang nagpasundayag sa ILOmination nga amo ang masunod:

• Pandangg Gitab Festival sang Oriental Mindoro
• Banaag Festival sang Anilao, Iloilo
• Dinagyang ILOmination contingent sang Iloilo City
• Pavvurulun Afi Festival sang Tuguegarao City, Cagayan; kag
• Zamboanga Hermosa Festival sang Zamboanga City

Nagdugang pa sang duag sa selebrasyon ang ang special performance sang Dinagyang Ilomination kag Lion and Dragon Dance Troupe sang Iloilo Cultural Federation Inc.

Sa mensahe naman ni Mayor Raisa Trenas, iya ginpahayag nga halin sang ginpakilala ang ILOmination sang 2023 kasunod sang pagbangon sang syudad sa epekto sang Covid-19 pandemic, ini nga okasyon ang nangin simbolo na sang kabakod kag paglaum sang mga Ilonggo.

Ginlaragway na ini subong sang alcalde bilang isa ka “major festival” nga nangin bukas para sa iban pa nga kapistahan halin sa iban nga mga rehiyon.

Bisan pa nga naga-moderno na ang Dinagyang suno sa iya, nagapabilin nga naka-angkla ang mga aktibidad sa debosyon sang mga Ilonggo kay Señor Santo Niño.

Subong nga adlaw, Enero 24, balantayan naman ang Dinagyang Pet Parade kag ang Festive Parade Sponsors’ Mardi Gras.

Ala una karon sa hapon, patigayunon ang Kasadyahan sa Kabanwahanan sa Iloilo Freedom Grandstand at 1 p.m. kag sa Iloilo Sports Complex umpisa naman 3 p.m.

Ang katapusan nga aktibidad subong nga adlaw amo ang Grand Religious Sadsad sa San Jose Parish Placer nga maga-umpisa alas syete sa gab-i.#

(Photo: Iloilo Dinagyang Festival/FB)