Gin-anunsyo sang Securities and Exchange Commission (SEC) nga nagpasaka ini sang kaso-kriminal batok sa Villar Land Holdings Corp. sang bilyonaryo nga negosyante nga si Manny Villar bangud sa ginaalegar nga market manipulation, insider trading, kag misleading disclosures.
Ginhingadlan nga respondents sa kaso nga gin-file sa Department of Justice (DOJ) si Villar Land chairperson kag former senator Manny Villar, Jr. kag ang iya asawa nga si former senator Cynthia Villar.
Yara man ang mga director nga sanday Cynthia Javarez, Manuel Paolo Villar, Senator Camille Villar, kag Senator Mark Villar.
Nalista man nga respondents ang independent directors nga sanday Ana Marie Pagsibigan kag Garth Castañeda.
Suno sa SEC, naglapas ang Villar Land — ukon kilala anay nga Golden MV Holdings Inc. — sa mga probisyon sang Securities Regulation Code (SRC) lakip na ang pag-ban sa sala ukon misleading statements kag transactions nga naga-operate bilang fraud sa investors.
Nagsentro ang kaso sa 2024 financial reporting sang Villar Land nga nagapakita sang P1.33-trillion nga total assets kag P999.72-billion nga net income. Mataas ini nga lukso halin sa P1.46 billion nga naganar sang kumpaniya sang 2023.
Apang suno sa SEC, ini nga figures ang ginpaguwa antes pa man na-finalize ang external audit. Sang napasa na ang audited statements, nagdangat ang total assets sa P35.7 billion nga fraction lang sang ila nga inisyal nga gin-claim.
Pahayag pa sang regulator, ang kaangot nga entities sa ila ginpasaka nga kaso ang nag-intra sa “trading activities that created artificial demand and supported the price of Villar Land shares.”
Espesyal pa gid nga nahingadlan si Camille Villar nga ginapahayag nga nagbakal sang 73,600 shares nga balor P1.43 million sang Disyembre 2017, inoras antes ang corporate disclosure nga rason sang pagsaka sang stock price sang kumpaniya.
Sa separado naman nga statement sang Villar Land, nagpahayag ini nga sabton kag atubangon nila ang alegasyon sang SEC.
“Villar Land and its directors will answer all the allegations leveled against them after formal receipt of the alleged complaint,” pahayag sang kumpaniya.#
Photo by: Miguel De Guzman
