Ginapaaligmat sang awtoridad ang publiko bangud sa ginaantisipar nga mangin epekto ni Bagyo Basyang sa probinsya sang Iloilo umpisa alas singko karon sa hapon.
Apang suno kay Dr. Alfonso Baldonado III, manager sang Emergency Operations Center sang Iloilo Provincial Disaster Risk Reduction and Management Office, ang maayo nga balita subong nga adlaw amo nga nagluya ang bagyo kag ginpanubo sang state weather bureau sa kategorya nga tropical depression halin sa tropical storm.
Sa 11:00 sa aga nga bulletin, nakasaad nga dala sang bagyo ang kabaskugon sang hangin nga 55 kph kag pagmadlos nga tubtub sa 70 kph.
Ulihi nakit-an ang sentro sang bagyo sa kadagatan sang Anda, Bohol kag nagahulag sa direksyon nga pa-nakatundan naaminhan-nakatundan sa kadasigon nga 10 kph.
Kun lantawon ang forecast track, magalabay ang sentro sang bagyo (ukon mag-landfall mismo) sa Bohol, southern Cebu, kag Negros Oriental halin karon sa hapon kag sa gab-i.
Buwas sa hapon naman ukon sa gab-i, magalabay ini malapit sa southern Panay Island.
Suno kay Baldonado, sa latest record sang talatapan, may masobra sa 600 ka mga pasahero nga na-stranded sa probinsya bangud sa malain nga tyempo partikular sa pantalan sa Dumangas kag sa Ajuy.
Magluwas diri, wala pa sang nakasulod nga report nga may apektado ukon nahalitan nga populasyon, mga dam, ukon sa sector sang agrikultura nga mahimo maangot sa bagyo.
Epektibo alas otso kaina sang aga, ginpasaka ang status sang bug-os nga probinsya sang Iloilo sa Red Alert.
Ini nagakahulugan nga ang tanan nga concerned agencies kag local government units (LGUs) ang dapat nga maghulag gilayon kag mag-implementar sang nagakaigo nga safety measures.
Kadam-an man sa LGUs sa probinsya ang nagdeklarar sang suspension sang klase subong nga adlaw agud maproteksyunan ang mga estudyante sa malain nga panahon.#
