Hugot nga nagpanindugan si Senator Panfilo “Ping” Lacson nga indi niya pagtugtan nga basta-basta nalang isuko sang Pilipinas ang Kalayaan Islands.
Ini nga panindugan ni Lacson ang sabat sa pahayag ni Senator Rodante Marcoleta nga “isuko na lang” ang Kalayaan Islands sa China, bangud ini ang malayo na sa exclusive economic zone (EEZ) sang Pilipinas.
Suno kay Lacson, indi niya ini pag-tugutan kay ang Kalayaan Islands ang kabahin nga pulo sang Palawan, kag gina-istaran sang indi magnubo sa 300 ka Pilipino.
Base sa prinsipyo sang “res nullius” ukon “terra nullius,” ang una nga tawo nga makadiskubre kag makapuyo sa duta nga wala sang may nagapanag-iya ang ginakilala bilang lehitimong nga naga-angkun sini.
Ginhimo ni Lacson bilang halimbawa si Tomas Cloma, nga isa ka abogado kag adventurer, nga nakadiskubre sang Spratly Islands kag gin-angkun ini antes ipasa sa gobyerno sang Pilipinas.
Bangud sini, suno sa batas, ang Pilipinas ang legal nga nagapanag-iya sang Kalayaan Islands.
Dugang pa ni Lacson, ang arbitral award sa West Philippine Sea wala nagasakop sa Kalayaan Islands, lakip na ang Pag-asa Island, gani indi dapat ini isuko.
Depensa naman ni Senator Marcoleta, nga ang iya ginpahayag ginasala-interpret lang, kag indi niya buot isuko ang Kalayaan Islands.
