Nagpaandam si Senate President Pro Tempore Ping Lacson batok sa iya ginbansagan nga “homegrown traitors” ukon mga Pilipino nga nagatraidor kag handa nga ibaligya ang pungsod para sa personal nga interes.
Suno kay Lacson nga isa anay ka pulis nga may masangkad nga eksperyensya sa intelligence work, ini nga mga indibidwal kag ang technical intelligence amo ang pinaka-common nga ginahalinan sang impormasyon sa geopolitics.
Sa intelligence operations suno kay Lacson, ginatawag ini nga ‘recruitment in place.’
Pahayag sini, mas epektibo ini para sa mga foreign entities ipaanggid sa pag-deploy sang mga agent bangud kinahanglan pa ang tinuig nga pagtuon sang lenggwahe kag cover-building.
Ini nga opinyon ni Lacson ang naangot sa pamangkot kun makabig bala nga mga traidor ang mga Pinoy nga mga opisyal kag social media personalities nga daw kaangay nga nagadampig sa China kag sa ila propaganda sa West Philippine Sea.
Ini nga klase sang mga indibidwal suno sa senador amo ang “vulnerable targets” bangud handa sila sa pagbaligya sang ila kaugalingon nga pungsod.
Ginklaro ni Lacson nga nagahambal siya sa “general principles” sang geopolitics kag intelligence kag wala nagahimo sang direkta nga akusasyon sa pila sa iya mga kaupdanan sa Senado nga ginatawag sang mga kritiko nga pro-China senators ukon mga “Tsinador.”
