Gin-aresto kag ginpahalin sa pwesto ang kapin 70 ka miyembro sang Philippine National Police-Regional Mobile Battalion 14-B sa idalom sang Police Regional Office-Bangasamoro Autonomous Region bangud sa pagsakit sa 128 ka mga bag-o nga pulis sa reception rites sa Lamitan City, Basilan.
Ang mga biktima ang lunsay bag-o gin-assign sa headquarters sang RMFB 14-B kag bag-o lamang nakagradwar sang Basic Internal Security Traininig.
Ang natabo nga hazing ang nakuhaan pa sang video kag nag-viral.
Ginkakas man sa pwesto ang 12 ka police non-commissioned officers nga direkta nga involved sa hazing.
Sa mga biktima, 18 ang nag-file na sang reklamo.
Ginalauman naman nga magapasaka man sang complaint ang iban pa.
Mangatubang sang administrative kag criminal cases ang mga pulis nga involved sa pagpanakit.
Makit-an sa video nga ginpaluhod, ginhampak, ginsumbag, kag ginkastigo ang mga biktima.
Detained naman subong ang mga pulis nga nagpanakit sang mga bag-o nga miyembro sang RMFB 14.
