Handa ang gobyerno sang Pilipinas nga dugangan pa ukon pasangkaron pa ang partnership sini sa Japan kun negosyo ang pagahambalan.
Ang Japan amo ang ikaduha nga pinakadaku nga trading partner sang Pilipinas. Naglab-ot sa P1.27 trillion ang balor nga nakuha sa trade sang nagligad nga tuig.
Ginpakigbahin naman ni Executive Secretary Ralph Recto ang interes para sa dugang nga negosyo kadungan sang 42nd Annual Joint Meeting of the Economic Cooperation Committees of the Philippines and Japan.
“The Philippines is ready to do more business with Japanese partners,” suno kay Recto. “You want clear rules. You want a coordinated government. And you want decisions made without delay. That is exactly what we are working to deliver,” pahayag pa sang former Finance chief.
Isa man ang Japan sa nagapanguna nga ginahalinan sang foreign direct investments nga nagapasulod sa Pilipinas sang P42.5 billion sa nauna nga 11 ka bulan sang 2025.
Luyag man sang Palace official nga mas mag-ayo pa ang partnership sang duha ka pungsod sa patag sang turismo ilabi na nga 407,000 Japanese ang nagbisita sa Pilipinas sang una nga 11 ka bulan sang 2025 samtang 825,000 Filipinos naman ang nagbisita sa Japan sa amo nga tion.
