Bag-o lang nakaabot sa Iloilo ang masobra duha ka kilo nga ginapasuni shabu nga nakumpiskar sang mga pulis sa isa ka high value individual sa Barangay Maya sa banwa sang Balasan kaina sang kaagahon.
Nagadangat sa P14,008,000 ang balor sang amo nga droga nga nakuha sa possession sang main subject nga si alias Bimboy, 46, residente sang Barangay Gogo, Estancia, kag yara sa regional target priority list.
Sa interview sang Bombo Radyo kay Police Major Dadjie Delima, head sang Provincial Drug Enforcement Unit sang Iloilo Police Provincial Office, iya ginpahayag nga kahapon sang kaagahon lang nag-abot ang suplay kag pahat-pahaton pa kuntani apang naabtan sang awtoridad.
Suno kay De Lima, sa kinaandan, ang amo sini kadaku nga volume nagahalin sa guwa sang Western Visayas, apang indi pa subong matumod kun diin gid ang partikular ang source bangud wala pa nagakooperar ang suspek.
Magluwas kay alias Bimboy, arestado man sa amo nga drug buy bust pasado ala una kaina sang kaagahon sanday alias Domingo, 63, sang Barangay Maya, Balasan; alyas Jose, 22, sang Brgy. Poblacion Norte, Balasan; kag alias Concepcion, 21, residente sang Ipil, Balasan.
Magluwas sa suspected shabu, na-recover man sang mga pulis ang 38 caliber revolver.
Suno kay De Lima, nadakpan na sang una si alias Bimboy bangud sa kaso nga kaangot man sa iligal nga droga.
Sandig pa sa pulis, naga-operate ini kag nagahatag sang tag-kinilo-kilo nga droga sa Quinto Distrito kag sa porsyon sang probinsya sang Capiz.
Naglawig sang apat ka bulan ang monitoring sang mga pulis antes dalayon nga nadakpan ang subject nga ginakabig madanlog sa awtoridad.
Nakahunong na ang ginaalegar nga mga durugista sa Balasan Municipal Police Station, kag natalana dal-on sa Regional Forensic Unit 6 para sa laboratory test kag pag-turn over sa nakumpiskar nga drug items.#
