Nagtakop na ang apat ka adlaw nga confirmation of charges hearing sang Pre-Trial Chamber 1 sang International Criminal Court (ICC) batok kay former President Rodrigo Duterte.
Kagab-i, ginhatagan sang tyempo ang kada partido — ang prosekusyon, ang common legal representatives sang drug war victims, kag ang defense — nga mapabati sa judges ang ila nga mga closing statement.
Suno kay Presiding Judge Iulia Antoanella Motoc, maga-deliberate ang chamber kag magapaguwa sang desisyon sa sulod sang 60 ka adlaw.
Ang mga senaryo nga mahimo matabo amo ang masunod:
- ikumpirma ang charges nga nakit-an sang Pre-Trial Chamber nga may bastante nga ebidensya, kag i-commit ukon ipasulod ang suspek sa Trial Chamber para sa trial
- indi pag-ikumpirma ang charges bangud wala sang bastante nga ebidensya nga nakit-an ang Chamber, kag untaton na lang ang proceedings batok kay Duterte
- i-adjourn ang hearing kag i-request sa prosekusyon nga maghatag sang dugang nga ebidensya, mag-conduct sang dugang nga imbestigasyon ukon amyendahan ang anuman nga kaso.
“The Defence and the Prosecutor cannot directly appeal this decision. However they can request authorisation from the Pre-Trial Chamber to appeal it,” suno sa korte sa The Hague.
Nanguna sa proceedings sa sini nga stage sanday Motoc (Presiding judge), Judge Reine Adélaïde Sophie Alapini-Gansou, kag Judge María del Socorro Flores Liera.
Wala nagtambong si Duterte sa apat ka adlaw nga proceedings kag ginpakamaayo sini nga magpabilin sa detention facility.
Ang akusasyon kay Duterte amo ang crimes against humanity nga murder kag attempted murder nga ginaalegar nakomiter sini sa Pilipinas halin sang Nobyembre 1, 2011 tubtub sang Marso 16, 2019. Nag-ugat ini sa iya nga kontrobersyal kag maduguon nga war on drugs campaign.#
