Nagpaandam ang Department of Economy, Planning and Development (DEPDev) sa posible paglab-ot sang inflation sa 7% kun magsingki kag magdugay pa gid ang giyera sa Middle East.
Ginplastar ini ni Socioeconomic Planning Secretary Arsenio Balisacan sa atubang sang mga kongresista sa Kamara.
Sa analysis sang ahensya, may yara sang duha ka senaryo nga matabo nga resulta sang away sang US, Israel, kag Iran.
Sa una nga senaryo, posible nga mag-average ang presyo sang langis sa $100 per barrel sa Marso kag magapabilin sa masobra sa $80 per barrel tubtub sa Mayo.
Sa ikaduha nga senaryo nga amo ang mas malala suno sa tiglikom, posible nga mag-average ang presyo sang langis sa $140 per barrel kag magpabilin sa masobra $80 per barrel tubtub sa Septyembre.
Sa idalom sang duha ka nasambit nga mga senaryo, posible suno sa opisyal nga maglapaw na ini sa upper band sang target sang gobyerno nga 2% to 4% nga inflation.
Sa una nga senaryo, ginalantaw nga magdangat sa 4.5%% tubtub sa 5.1% ang inflation sa Marso.
Sa Scenario 2 naman suno kay Balisacan, posible ini magdangat sa 6.3% tubtub sa 7.5% sa Marso kag maglab-ot pa gid sa 6.4% tubtub sa 7.5% sa Abril.
Antes ang gyera sa Middle East, gina-forecast sang socioeconomic planning agency nga mag-average ang inflation sa 3.6% sa 2026 kag 3.2% sa 2027.#
