Ginapaabot sang Department of Agriculture ukon DA ang P6.2 bilyon nga pondo halin sa Department of Budget and Management agud mabuligan ang mga mangunguma kag manug-pangisda.
Suno sa DA, ang ginalauman nga pondo ang igagastos sa gasolina kag abono para sa mga mangunguma kag manug-pangisda bilang preparasyon sa ginapaabot nga daku nga epekto sang El Niño.
Ginpahayag pa nga kabahin man sang pagpanghanda ang padayon nga pag-import sang bugas agud mapasiguro nga may yara sang igo nga supply sang bugas sa pungsod.
Nagapangayo man ang ahensya sang tubtob P5 bilyon nga dugang nga pondo para sa solar irrigation agud mabuligan ang mga mangunguma nga makapatubig sang ila uma apisar sang tuman kainit nga tyempo.
Dugang pa sang ahensya nga paagi sa nasambit nga mga pondo, mas mangin handa ang sektor sang agrikultura sa epekto sang El Niño kag mapabilin nga may igo nga suplay sang pagkaon.
