Ginmandu sang Department of Agriculture (DA) ang pagpauntat sang pag-export sang fresh ube ukon purple yam.
Suno kay Agriculture Secretary Francisco Tiu Laurel Jr., ang indefinite suspension makabulig samtang nga kulang ang planting materials sa Pilipinas.
“We severely lack planting material ourselves, and we don’t want to export it to countries that could use Philippine ube varieties to compete with us,” suno sa tiglikom.
Sakop sang mando ang ube kag mga propagative planting materials nga ginagamit para sa pagkaon, pagtanom, ukon research.
Suno sa Bureau of Plant Industry (BPI), ginpahibalo na sini ang Bureau of Customs kag ginmanduan ang mga plant quarantine stations nga untatan ang pag-isyu sang phytosanitary certificates para sa mga shipment sang ube nga apektado sang suspension.
Ginpahayag sang BPI nga temporaryo nga safeguard ini samtang nagahimo ang gobyerno sang bag-o nga mga polisa kag regulasyon nga magalakip sa purple yam sa mga produkto nga sakop sang export restrictions.
Ginpatuman ini samtang ginapasangkad sang Pilipinas ang produksyon kag pagproseso sang ube bangud sa nagasaka nga global demand. Ini nga produkto nakaabot na sa Canada, Middle East kag pila ka bahin sang Asia, kag ginalantaw nga makalab-ot pa gid sa US, South Korea kag Europe.
Matandaan nga gin-aprubahan ni President Ferdinand Marcos Jr. ang P300-million nga budget para sa industriya sang ube sa masunod nga tuig agud suportahan ang pagpasangkad sini.
Naga-develop naman ang BPI kag mga researcher halin sa University of the Philippines Los Baños sang genetic map sang mga Philippine ube varieties agud maprotektahan ang native varieties batok sa biopiracy, mapamatud-an ang pagka-original sang mga produkto sa export markets, kag makabulig sa pag-develop sang mas madamo nga ani.#
