Ginasuportahan sang Department of Health (DOH) ang proposal nga pasakaan ang excise tax sa mga matam-is nga ilimnon.
Ginapanan-aw sang ahensya nga paagi sa buwis, makabulig ini sa pagpanubo sang disease burden ukon problema sa kadamuon sang mga balatian sa pungsod.
Kaangot ini sa ginduso sang Department of Finance (DOF) nga pasakaan ang tax sa mga sweetened beverages nga may caloric sweeteners halin sa P6 kada litro pakadto sa P20 kada litro.
Para sa mga ilimnon nga may high-fructose corn syrup, gina-propose nga pasakaan ang tax halin sa P12 pakadto sa P40 kada litro kag may singko porsyento nga annual adjustment.
Ginduso man nga kuhaon ang tax exemption sa natural fruit kag vegetable juices pati sa mga pagkaon pareho sang ice cream kag frozen yogurt.
Suno sa DOH, ang mas mataas nga buwis mahimo makapaluya sa mga consumers, ilabi na sa mga pamatan-on, sa masami nga pagbakal sang matam-is nga ilimnon nga nalakip sa pila ka health problems.
Suno sa 2023 Global Burden of Disease study, ang mataas nga pagkonsumo sang carbonated ukon fizzy drinks sa Pilipinas may kaangtanan sa ginabulubanta nga 3,537 ka kamatayon kag sobra 143,000 ka disability-adjusted life years.
“These estimates do not mean that sweetened beverages cost each, every individual case. They just show that high consumption makes a measurable and preventable contribution to the country’s disease burden,” suno kay Health Assistant Secretary Lester Tan.
Nagpaandam man ang DOH nga ang masami nga pag-inom sang matam-is nga ilimnon mahimo magresulta sa pagdugang sang bug-at kag metabolic problems nga nagapataas sang risgo sa sakit sa tagipusuon, diabetes, kag pila ka klase sang cancer.
“So, sweetened beverage taxation changes the environment in which our consumers, particularly the young ones, make choices. And therefore, higher relative prices would make highly sweetened beverages less financially attractive, while water and unsweetened beverages would become comparatively more attractive,” dugang sang health official.#
