Nagpaandam ang militar sang Iran nga dalayon nila nga siraduhan ang bilog nga Strait of Hormuz pananglitan bombahan sang Estados Unidos sang Amerika ang mga power plant sang Tehran.
Suno sa Iran, indi nila pagbuksan ang bilog nga Strait tubtub nga indi pa nila maubos tukod ang power plants nga gub-on sang Estados Unidos.
“If the United States’ threats regarding Iran’s power plants are carried out… the Strait of Hormuz will be completely closed, and it will not be reopened until our destroyed power plants are rebuilt,” suno sa military operational command nga Khatam Al-Anbiya sa statement nga ginpagwa paagi sa Iranian state television.
Nagpaandam man sila nga atakehon nila ang power plants, energy, kag information and communications technology (ICT) infrastructure sang Iran kag ang mga power plants sa mga pungsod sa Middle East nga may yara sang US bases kag mga kumpaniya nga may US shareholders.
Gindugang sang Iran nga dugangan pa nila ang ila ibalos agud nga depensahan ang ila pungsod sa interes sang ila nasyon kag mga pumuluyo.
Matandaan nga antes sini, nagpaandam si US President Donald Trump kahapon nga may 48 lang ka oras ang Iran agud buksan ang Strait bangud kun indi, atakehon sang US ang ila energy infrastructures lakip ang power plants.
Ginbalabagan sang Iran ang Strait of Hormuz kag ginaalegar nga ginpangbutangan sang mga bomba halin sang nagsugod ang gyera sa Middle East sang Pebrero 28, apang may pila pa ka mga barko nga nagaagi diri nga indi iya sang Amerika kag Israel.
Tuman ka importante ini nga Strait bangud diri nagaagi ang 25% sang langis nga ginagamit sang kalibutan.
