Nagasumpakilay ang pahayag sang Iran kag Estados Unidos sang Amerika kun may yara na gid man sang negosasyon nga untatan na ang gyera sa Middle East.
Kun si United States President Donald Trump ang pahambalon, may maayo na sila nga istoryahanay.
Bangud sang amo nga negosasyon suno kay Trump, ginpakamaayo sini nga ipaiway na ang iya ginhatag nga 48-oras nga ultimatum sa Iran kag indi sini pagdayunon ang pagbomba sa mga power plants sang amo nga pungsod.
Suno pa kay Trump, gin-postpone man sini ang iya plano nga atakehon ang energy grid sang Iran sa sulod sang lima ka adlaw.
Ginpahayag man sini sa atubang sang media nga ang iya special envoy nga si Steve Witkoff ang naka-istorya na sa mataas nga Iranian official sang Domingo sang gab-i kag magapadayon ini tubtub sa Lunes.
“We have had very, very strong talks. We’ll see where they lead. We have major points of agreement, I would say, almost all points of agreement,” pahayag sini samtang yara pa sa Florida.
Sa Memphis, Tennessee, nagpahayag man ini nga madugay na naga-negosyar ang US sa Iran.
Wala sini ginpangalanan kun sin-o nga Iranian official ang gin-istorya sang US, apang suno sa iya, respetado ini nga tawo kag isa ka lider.
“We’re dealing with some people that I find to be very reasonable, very solid. The people within know who they are. They’re very respected, and maybe one of them will be exactly what we’re looking for,” suno kay Trump.
FAKE NEWS?
Gintawag naman sang Iran nga “fake news” ang ginapanghambal ni Trump.
Suno kay Iran parliament speaker Mohammad Baqer Qalibaf, wala sang anuman nga negosasyon nga natabo. Ginahimo lang ang fake news suno sa iya agud nga ma-manipula ang financial kag oil markets.
“No negotiations have been held with the US, and fake news is used to manipulate the financial and oil markets and escape the quagmire in which the US and Israel are trapped,” post sini sa X.
Ginpanindugan sini nga nga magatimalos ang Tehran sa mga nag-atake sa ila.
Pahayag pa sini, nagatindog sila sang malig-on bilang suporta sa ila nga Supreme Leader kag sa mga pumuluyo sang ila nasyon tubtub nga malab-ot nila ang ila nga tinutuyo.
“Iranian people demand complete and remorseful punishment of the aggressors. All Iranian officials stand firmly behind their supreme leader and people until this goal is achieved,” dugang sang opisyal.
Nagpaandam man ang elite Revolutionary Guards sang Iran nga magapadayon sila sa pagbomba sa US targets. Gintawag nila ang mga tinaga ni Trump nga “psychological operations”.
Domingo sang aga oras diri sa Pilipinas sang nagpaandam si Trump nga may 48 ka oras lamang ang Iran agud nga buksan ang Strait of Hormuz, bangud kun indi, bombahan nila ang mga power plant sang amo nga pungsod.
Wala nagpalingkang ang Iran kag nagbalos man sa paandam nga dalayon nila nga siraduhan ang Strait of Hormuz kun tandugon ang ila nga power plants.
Nagpaandam man ang Tehran nga iguon nila ang mga imprastraktura sang mga kaalyado sang US sa Middle East pananglitan dayunon ni Trump ang iya paandam.
