Nagpatigayon sang ila labing una nga weekly meeting ang Iloilo City Crisis Management Council agud mapabakod pa ang preparasyon sang syudad sa nagapadayon nga pagpanghangkat sa energy kag resources.
Sa interview sang Bombo Radyo Iloilo kay Engr. Neill Ravena, head sang City General Services Office kag Energy Efficiency and Conservation Officer sang nasambit nga komitiba, iya ginpahayag nga ila giintalakay ang water conservation, energy conservation, kag fuel conservation agud mangin makinot ang paggamit sang enerhiya.
Gina-engganyo man nila ang publiko nga magtipid sang paggamit sang enerhiya sa mga panimalay, paagi sa pagpahibalo sa publiko sang nagakadapat nga obrahon.
Ang energy team sang syudad nagapanawagan man nga hagan-haganon sa paggamit ang mga appliances, ilabi na ang mga climate-control devices nga naga-konsumo sang dako nga kuryente.
Samtang, ginpasiguro naman ni Mayor Raisa Treñas nga padayon nga ginatutukan sang lokal nga panguluhan ang ini nga sitwasyon agud masiguro ang kahandaan sang syudad.
Dugang pa ni Ravena, ang syudad man sang Iloilo ang isa sa mga nagpanguna nga nagpatuman sang nasambit nga komitiba.
Nagpanawagan sila sang kooperasyon kag pagbinuligay sa publiko agud mas mangin epektibo ang pagpatigayon sang nasambit nga inisyatibo.
