Ginkumpirma sang White House nga may ginakonsiderar subong nga kasugtanan nga 45 ka adlaw nga ceasefire sa Iran, apang wala pa ini gin-aprubahan ni US President Donald Trump kag ginapadayon pa sini ang gyera subong.
Antes sini, nauna na nga gin-report sang US media nga may proposal ang mediators para sa 45-day ceasefire sa Middle East kag nabaton na ini sang Washington.
Ginalauman nga mismo si Trump ang dugang nga magahambal kaangot diri sa iya scheduled news conference sa Lunes sang hapon (oras sa Washington).
Naka-sentro ang iya conference sa madinalag-on nga pagluwas sa ikaduha nga myembro sang U.S. F-15E fighter jet nga ginpatibusok sang Iran sang Byernes.
Una na nga gin-anunsyo ni Trump sang weekend nga updon sini ang mga myembro sang military sa media conference.
Pebrero 28, 2026 sang nagsugod ang gyera sang Israel kag US batok sa Iran tubtub nga naglapta ini sa Middle East kag may epekto naman sa iban nga mga pungsod lakip na sa Pilipinas.
